लोकमानसिह कार्कीको मुद्दाआजदेखि सुनुवाई सुरु

बिहिबार, मंसिर १६, २०७३ | ०९:०६:३५ am मा प्रकाशित
FacebookTwitterGoogle+PrintEmailShare

काठमाडौं, मंसिर १६ : अख्तियार दुरुपयोग अनुसन्धान आयोगका प्रमुखमा लोकमानसिंह कार्कीको नियुक्तिलाई सदर गर्ने निर्णयमाथि परेको पुनरावेदन मुद्दामा आजदेखि सर्वोच्च अदालतमा सुनुवाइ हुनेभएको छ ।
सर्वोच्च अदालत प्रशासनले प्रकाशित गरेको साप्ताहिक पेसी सूचीमा ७ वटा मुद्दा कार्की प्रकरणसँग सम्बन्धित छन् । सूचीअनुसार कार्कीको नियुक्ति र योग्यतासम्बन्धी फैसला पुनरावलोकनको माग गरिएका दुई मुद्दा बिहीबार सर्वोच्च अदालतको पूर्ण इजलासमा पेस हुनेछन् । न्यायालयको सम्पूर्ण कामकारबाही र प्रक्रिया नै प्रभावित पार्ने प्रयास गरेको भन्दै कार्कीमाथि न्यायिक निलम्बन र उनका सम्पूर्ण सुविधा खोस्नुपर्ने माग राखी दायर रिट निवेदन पनि पेसी सूचीमा छ ।

म्याद तामेलीमा अवरोध गरेको आरोपमा सर्वोच्च प्रशासनले नै पेस गरेको प्रतिवेदनका आधारमा काठमाडौं महानगरपालिका वडा नम्बर १० की सचिव सरिता राई, नासु भेषराज अर्याल र सर्वोच्च अदालतका तामेल्दार शम्भु खत्रीमाथि पनि कारबाहीको प्रस्ताव गरिएको थियो । त्यसबाहेक कार्कीसहित ४ जनाविरुद्ध म्याद तामेलीमा गरेको अवरोध र लोकमान तथा कृषि विकास बैंकका अध्यक्ष प्रमोद कार्कीले वारेस राख्न दिएको निवेदन पनि साप्ताहिक पेसी सूचीमा छ ।

प्रधानन्यायाधीश सुशीला कार्कीसहित न्यायाधीशहरू विश्वम्भरप्रसाद श्रेष्ठ र सपना प्रधान मल्लको पूर्ण इजलासले लोकमानविरुद्ध अधिवक्ता ओमप्रकाश अर्यालले दिएको निवेदनमा २०७१ भदौ ३१ गते ‘निस्सा हुने’ आदेश दिएको थियो । लोकमानमाथि उनको योग्यताको प्रश्न पुनरावलोकनको निवेदनमा समावेश छ ।

रायमाझी आयोगको प्रतिवेदन, सामान्य प्रशासन मन्त्रालयले उनीमाथि थालेको कारबाही, सरकार तथा अख्तियारले नै उनी सरकारी पदका लागि अयोग्य हुने भनी गरेको निर्णयलगायत आधारमा उनी अख्तियार प्रमुख हुन नसक्ने दाबी निवेदनमा छ । यसबाहेक २० वर्षे योग्यताको प्रश्न पनि निवेदनमा उठाइएको छ ।

प्रतिकृया