मन्त्रिमण्डल हेरफेर हुदैन : प्रधानमन्त्री ओली

शनिबार, भदौ २३, २०७५ | १२:५१:५२ pm मा प्रकाशित
FacebookTwitterGoogle+PrintEmailShare

kp oliकाठमाडौं, भदौ २३ : प्रधानमन्त्री केपी शर्मा ओलीले वर्तमान मन्त्रिमण्डल तत्काल हेरफेर नहुने बताएका छन् । सरकारलाई अस्थिर बनाउन चाहनेले मन्त्रीहरु हेरफेर हुने हल्ला चलाएकोको उनको भनाइ छ ।

जिल्ला समन्वय समिति महासंघ नेपालको पहिलो राष्ट्रिय भेलालाई शनिबार काठमाडौंमा सम्बोधन गर्दै प्रधानमन्त्री ओलीले भने, ‘केही हुनेवाला छैन । राम्रो काम गरिरहेमा कुनै मन्त्री हट्ने छैनन् ।’

यसअघि सरकारका केही मन्त्रीहरुको कार्यशैलीमा प्रश्न उठेपछि मन्त्रीहरु हेरेफेर हुने चर्चा चलेको थियो । त्यहीबेला नेकपा अध्यक्ष प्रचण्डले पत्रकारहरुसँगको भेटमा सरकारको गम्भीर समीक्षा हुने अभिव्यक्ति दिएका थिए ।

तर, प्रधानमन्त्री ओलीले तत्काल मन्त्री हेरफेर हुने भन्ने हल्ला सत्य नभएको स्पष्ट पारे ।

प्रधानमन्त्री ओलीले आफ्नो नेतृत्वमा पार्टी र सरकार बलियो बनेकाले विरोधीले हमला गरिरहेको बताए । तर आलोचना र हमलाबाट कोही डराउनु नपर्ने उनको भनाइ छ ।

प्रधानमन्त्री ओलीले भने, ‘सरकार दूरदर्शी र स्पष्ट सोचका साथ विकास र समृद्धिका लागि काम गरिरहेको छ । छिमेकीसँगको सम्बन्ध सुधार र सहकार्य बढाउँदै हामी अघि बढिरहेका छौँ । कतिपयलाई यो मन परिरहेको छैन ।’

प्रधानमन्त्री ओलीले भने, ‘छ महिनापछि धूलो र हिलोरहित काठमाडौं हुन्छ । दुई वर्षभित्र बाटा पक्की हुन्छन् । यसमा कोही आत्तिएर केही हुँदैन, सरकार ढल्दैन ।’

प्रतिकृया