खुकुरी हानेर २६ वर्ष अघि पनि पाँचथरमै भएकाे थियाे परिवारको विभत्स हत्या

बुधबार, जेष्ठ ८, २०७६ | ११:२९:२० am मा प्रकाशित
FacebookTwitterGoogle+PrintEmailShare

पाँचथर । खुकुरीले हानेर पाँचथरैमै २६ वर्ष अघि पनि विभत्स सामुहिक हत्या भएको थियो। जहाँ एकै परिवारका पाँच जना मारिएका थिए।

मिक्लाजुङ–३ आरुबोटेमा सोमबार राति दुई परिवारका नौ जनाको विभत्स हत्या भयो। उक्त घटना पाँचथरमा २६ वर्षपछि ठूलो र उस्तै प्रकृतिको हत्याकाण्ड भएको हो।

तत्कालीन फिदिम–१३ लुङरुपास्थित टिम्बुरेमा एकै परिवारका पाँच जनाको ज्यान लिने गरी हत्याकाण्ड भएको थियो।

२०५० मा भएको सो घटना ‘टिम्बुरे हत्याकाण्ड’को रुपमा चर्चित छ। घटनामा टिम्बुरेस्थित एक दुलाल परिवारमा पाँच जनाको ज्यान गएको थियो। त्यसको २६ वर्षपछि आरुबोटेमा नौ जनाको विभत्स हत्या भएको हो।

टिम्बुरे हत्याकण्डमा कुवेर दुलाल, कुवेरकी श्रीमती सरसस्वती रिजाल, छोरी कृष्ण दुलाल, छोरा उमेश र उद्वव दुलालको मृत्यु भएको थियो।

लुङरुपा–९ का कुवेर दुलाललाई छिमेकी तत्कालीन नाँगीन गाविस–३ सेजेपामा र उनकी श्रीमती सरस्वतीसँगै छोराछोरी कृष्ण, उमेश र उद्ववलाई घरैमा एकसाथ खुकुरी प्रहार गरी हत्या गरिएको थियो।

घटनामा कुवेरकी छोरी ज्ञानु र मनु बाँचेका थिए। मनुको २०७३ मा अमेरिकामा हृदयघातका कारण मृत्यु भएको थियो। ज्ञानु अहिले अमेरिकामा छिन्।

बाबुआमा र भाइबहिनीको हत्या भएका बखत मनु नाँगीनको पिपलबोटे उच्च माविमा पढ्दै गरेको र  ज्ञानु इटहरीस्थित आफन्तको घर गएकी थिइन्। दुलाल परिवारको पनि खुकुरीले काटेर हत्या भएको थियो।

परिवारभित्रै आपसी लेनदेन र राजनीतिक विषयमा विवाद भएपछि उनीहरुको हत्या भएकाले सो हत्याकाण्ड टिम्बुरे हत्याकाण्ड भनेर चर्चित छ।

त्यस्तै, सोमबार राति आरुबोटे हत्याकाण्डमा दुई परिवारको खुकुरीले धेरै पटक हानेर विभत्स हत्या भएको छ। पाँचथर प्रहरी प्रमुख नरेन्द्र कुँवरका अनुसार दुई परिवारका आठ वर्षीया बालिकादेखि ७५ वर्षीया वृद्धसम्मको हत्या भएको हो।

७५ वर्षीय बमबहादुर फियाक, उनकी श्रीमती ७५ वर्षीया पुर्चीमाया फियाक, छोरी वर्ष ३५ की मनकुमारी फियाक,  नातिनी वर्ष १० की आसिकाकुमारी खजुमलाई पालैपालो धारिलो हतियार प्रहार गरी हत्या गरेको प्रहरी नायब उपरीक्षक नरेन्द्र कुँवरले बताए।

त्यस्तै, सोही स्थान बस्ने ३४ वर्षीय धनराज शेर्मा, उनकी श्रीमती ३५ वर्षीया जस्मिता फियाक शेर्मा, छोरी १२ वर्षीया युहाना शेर्मा, १० वर्षीया मुना शेर्मा र ६ वर्षीया इच्छा शेर्माको हत्या गरिएको कुँवरले बताए।

आरुबोटे हत्याकाण्डमा हत्या भएका मृतकको शव परीक्षणका लागि विपी कोइराला प्रतिष्ठान, धरान लगिएको रवि इलाका प्रहरी चौकीका प्रहरी निरीक्षक तेजनारायण यादवले बताए।

उनका अनुसार काठमाडौँबाट आएको नेपाल प्रहरीको केन्द्रीय अनुसन्धान ब्यूरो (सिवीआई)को विशेष टोलीले घटनाको आज पनि अनुसन्धान जारी राखेको छ।

मङ्गलबार हत्या भएका बमबहादुरका कान्छा ज्वाइँ मानबहादुर माखिमको पनि झुण्डिएको अवस्थामा शव फेला परेको छ। हत्या माखिमले नै गरेको हुनसक्ने प्रहरीको आशङ्का छ।

हत्या भएको करीब पाँच किलोमिटरको दूरीमा उक्त शव फेला परेको प्रहरी निरीक्षक यादवले बताए। शव झुण्डिएको स्थानको दुई किलोमिटर अगाडि एउटा झोला भेटिएको छ। झोलामा रगतले लतपतिएको कपडा र रगतले लतपतिएको एक थान खुकुरीसमेत फेला परेको यादवले बताए। (रासस)

प्रतिकृया